Semeya colos alumnos asistentes al taller lliterariu. Nel centru Humberto Gonzali y Aurora García Rivas. Segundu pela derecha Illán Gonzali

Esti añu'l centru xixonés d'educación secundaria de La Salle dedicara la so selmana cultural al llibru. Na so organización collaboró'l fundador de l'Arribada y directivu de la nuestra asociación Humberto Gonzali, qu'ufrió un conxuntu d'iniciatives y participantes qu'enllenaron la mayor parte de les actividaes de la selmana, arriendes de xestionar la donación de lotes de llibros n'asturianu provinientes del Principáu d'Asturies, de l'Academia de la Llingua y de la editorial Trabe. Ente los actos promovíos dende la nuestra asociación figuraron un taller lliterariu empobináu pola galardonada escritora Aurora García Rivas, una charla sobre l'aspectu comercial del llibru a cargu del editor Inaciu Iglesias, una conferencia sobre los mitos del conceyu de Xixón que fizo Alberto Álvarez Peña, amás d'un conciertu didáticu-musical desarrolláu por Dani García de la Cuesta y la proyección del videu “Facer televisión n’asturies” realizáu por Illán Gonzali. De too ello da cuenta'l colexu na so revista "El Cerro", dedicándo-y tres páxines, agradeciendo especialmente l'aportación a la Selmana Cultural fecha por Humberto Gonzali y María Teresa González Cobos.

 

Orbayando foi una revista asturiana d'información que s'editó en Xixón ente los años 1988 y 1990. La revista nació col envís de defender los intereses d'Asturies, los sos valores, les sos señes d'identidá, llingua, vezos, tradiciones y la esistencia de poder políticu p'Asturies, declarándose independiente de cualquier partíu políticu o grupu socioeconómicu de presión. Utilizaba indistintamente la llingua asturiana y castellana nos sos conteníos, que trataben temes d'actualidá, cultura, política, sindicalismu, etc. El conseyu de dirección taba formáu por Humberto Gonzali, Juan Bonifacio Lorenzo Benavente y Xicu Monteserín. El númeru cinco y últimu ta fecháu en mayu de 1990. Nel entamu del númberu cero, que s'asoleyó en setiembre de 1988, xustifícase la elección del nome de la revista diciendo que vieno de la rempuesta a los requerimientos fechos a D. Patricio Adúriz, cronista oficial de Xixón, y que suxirió un nome históricu: Orbayando.

El 13 d'ochobre de 1952 aconceyaba un grupu d'intelectuales col envís de fundar una Peña Artístico-Literaria pa contribuyir al esplendior cultural de Xixón. Ñacen los Ruxidores, de la mano del doctor José Manuel García de la Torres y de José Manuel Paraja. Y al poco, en xineru de 1953, la revista mensual Orbayando sal a la cai dende La Nueva España y baxo un editorial nel que se diz que "como todas las empresas y con mayor motivo cuanto más ambiciosas son, ésta nuestra ha tenido muy diversas acogidas". Dirixe la revista Enrique Prendes y el dibuxu cubierta ye obra d'Ulises Meana. Plumas al vuelo, Surcos, Entre nosotras, Tierra, Caxigalines o Confidencias, son secciones a facer polos José Manuel Benítez, Antonio Conde, Antonio Martínez, Baltasar Vicente Montes, Elvira Llamas, Angelina Rosete, Antonio G. Cobos, Tomás Montero, José Luis Michelón, Conrado Sabugo, J. Bustamante, J. Guerra-Peláez, Oscar Acebal, Piñera-rias, Luciano Castañón, Marino Galán, Celso Martínez y tamién un Enrique García-Rendueles qu'empieza'l so Vocabulario de los nuevos bablistas. Orbayando -promediu de 30 páxines-, al pesar del puxu anicial, conclúi col númberu 4, correspondiente al mes d'abril.

Col envís de da-y un tratamientu claramente asturianu a los acontecimientos del añu 1808, que supunxeron un fitu nel autogobiernu d'Asturies, la edición d'esti añu de l'Arribada entamará una mesa onde se falará sobre los estremaos aspectos de  los fechos históricos que sucedieron naquella dómina. Igualmente, habrá presentación d'obres rellacionaes con esta fecha y que se publicaran nos últimos meses.

La edición de 2008 de l'Arribada va reserva-y un espaciu al visionáu de clásicos de la cinematografía en versión asturiana. Ente los títulos que van poder ver los asistentes a esti eventu figura'l Frankenstein de los Estudios Edison, del añu 1910. Esta película proyectóse en delles sales de los Estaos Xuníos hasta qu'a la fin d'esi añu foi prohibida al ser considerada blasfema, pola mor de la idega de que l'home puea crear a otra criatura humana. Desaniciáronse les copies que se taben usando y durante décades consideróse como ún de los más importantes clásicos perdíos del cine mundial, hasta que nos años 70 se conoció la esistencia d'una copia que yera propiedá d'un coleccionista priváu. Esti coleccionista nun permitió que se viera en público'l film, hasta que después de la so muerte, y nel añu 2003, pudieron facese unes poques proyecciones. El Frankenstein de los Estudios Edison ye la primer representación cinematográfica del personaxe creáu pola escritora Mary Shelley, cola salvedá de que nesta primera apaición nel cine'l monstru nun ta fechu con cachos de calabres, ye frutu d'una fórmula alquímica. Na Arribada va vese, pela primer vegada n'Asturies, y n'asturianu, esta xoya cinematográfica.

La edicion de 2008 de l'Arribada va dedica-y una xornada al mundu de la bloguesfera n'asturianu. Pa ello van entamase delles actividaes pa dar a conocer les estremaes aportaciones d'esta triba que s'afayen pela rede, contando pa ello con convidar al mayor númberu posible de blogueros. Deseguida, la Secretaría Técnica del eventu va comenzar a facer invitaciones a los autores de blogues na nuestra llingua pa participar nel día dedicáu a esti tema, asina como nel restu de les xornaes.

Alberto Álvarez Peña ye dende ayerí'l nuevu presidente de l'Asociación Cultural l'Arribada. Nacíu en Xixón en 1966, Berto Peña, ye un escritor, etnógrafu, dibuxante ya ilustrador d'obres perconocíu nel mundu la cultura asturiana. La so obra céntrase en gran midida nos llibros sobre la mitoloxía del país. Ye cofundador del cómic El Llapiceru y ún de los creadores del Salón del Cómic de Xixón, amás de miembru del Conceyu d'Estudios Etnográficos Belenos. Dientro del so trabayu como ilustrador abarca tou tipu d'obres. Ente les sos obres destacamos, como escritor, Lliendes de Piloña, Asturies Máxica: Un viaxe ilustráu pela mitoloxía asturiana, Mitología Asturiana, Xana, Cuélebre, La brujería en Asturies, Animales míticos d'Asturies, Nuberu, Cuélebres, culobras, culiebres y culiebrones, la culiebra na mitoloxía asturiana, Celtas en Asturias, Motivos tradicionales asturianos, Mitos y leyendas asturianos, Simbología mágica tradicional, Los mitos de Xixón, Esconsuros y responsorios o Garrapiellu de Tradición oral asturiana; y na so faceta d'ilustrador, Libro de la gaita (de Malo Quirós), Fontenebrosa (de Vicente García Oliva), Camientos, coses, curuxes (d'Helena Trexo) y Ello yera una vez (de Fernando de la Puente).

Ayeri aconceyó l'Asociación Cultural l'Arribaba pa tratar delles cuestiones venceyaes a la so estructura. Ente otros asuntos, votóse la composición de la nueva directiva de l'asociación que dende ayeri queda compuesta de la forma que sigue:

Presidente Alberto Álvaez Peña, Secretaria María Teresa González Cobos, Tesoreru David Rivas Infante, vocales Xosé Nel Riesgo, Humberto Gonzali, Illán Gonzali y Roberto González.

Depues, la nueva directiva aconceyó con otres persones pertenecientes a la organización de l'Arribada 2008 (Juan Carlos Casimiro, Aurora García Rivas, Carlos Espina y Xicu Monteserín), pa zarrar la conformación del programa de la edición d'esti añu.

Escoyóse como coordinador de la Secretaría Técnica de l'Arribada 2008 al escritor y xestor cultual Humberto Gonzali.

La organización de l'Arribada aconceyará'l prósimu miércoles, d'alcuerdu cola axenda programada pola Xunta Directiva de l'asociación homónima, pa zarrar el programa de la edición de 2008. Esti añu habrá importantes novedaes, tanto nel formatu del eventu como nes actividaes, dándose un perimportante impulsu a la presencia de lliteratures d'otros países. Igualmente, reforzaráse'l respaldu políticu ya institucional. Nos prósimos díes daráse anuncia del programa y de les correspondientes novedaes ya incorporaciones al proyectu.