L’Asociación de Folclor Tradicional La Quintana, celebra’l prósimu sábadu día 3 de mayu del 2008, el 11 Alcuentru de bandurrieros, en Caliao, Casu, Asturies. www.laquintana.as  . Con esti, van ya 11 alcuentros dende que nel añu 1998 s’entamara esta actividá anual, qu’añera nun solo la recuperación de la bandurria sinón tamién del rabel, instrumentos populares de cuerda esfrotiada utilizaos en dellos llugares de la península. Les actividaes musicales desendolcaránse a partir de les 6 de la tarde nel salón de les antigües escueles de Caliao, remozaes como local p’actividaes culturales del pueblu. Nesta edición va facese un homenax al bandurrieru Cefero Traviesas, vecín que fue de Caliao y que morrió en marzu de 1995. Gracies a distintes imáxenes y grabaciones, podremos facer una alcordanza y escuchar a esti bandurrieru, amás, contaremos cola presencia de los sos familiares, a los que se-yos entregará un recuerdu d’esti alcuentru. Tamién va facese alcordanza del rabelista cantabru Paco Sobaler, que morrió nel mes d’avientu del 2007. Más llueu, entamará’l conciertu onde tocarán bandurrieres y bandurrieros veníos d’estremaos llugares d’Asturies, y de rabelistes d’otres partes, como José Antonio Martínez Porras “Chirri”, de La Rioja, o Quique Sabaté, d’Alcalá de Henares, etc.

L’Alcuentru de bandurrieros tá despeslláu a la participación d’aquelles persones que quieran tocar y alitar l’usu d’estos instrumentos. Caberamente, dase pasu tamién al usu de la gaita rabil, instrumentu que comparte historia cola bandurria asturiana. Nesta edición, amás, coincídese con unes xornaes reivindicatives del cuidao del entornu ambiental y escontra la posible costrucción de la presa de Caliao, pa ello tán programaes conferencies y otres actividaes enartiaes al movimientu de la nueva cultura del agua. http://ecologistasenaccion.org/spip.php?article10998  

Esti añu, el 11 Alcuentru de bandurrieros en Caliao, desendolcaráse, como n’años anteriores, alredor de la festividá local de Santa Cruz, que n’otros tiempos marcaba’l tiempu de dir subiendo’l ganao pal monte y escoyer xuez, o xueces de pastos. Nel mesmu local, pela nueche, habrá una verbena que durará hasta les tantes. Pa más información podéis contautar con estes señes, teléfonu 626511863 y corréu n’interné: dagarcues@yahoo.es                                                                       

Seición "Músiques" del programa "Nós" emitíu'l 12 d'Ochobre de 2007 y dedicáu a la Escuela de Música Tradicional "La Quintana", de Xixón.
Nesti capítulu, Próspero Morán invítamos a escucar nes clases d'esta escuela onde conocíos músicos asturianos como Toli Morilla o Diego Pangua deprénden-yos a los sos "escolinos" tolos secretos de los instrumentos y les melodíes tradicionales.

Canción del grupu asturianu "Llan de Cubel", con melodía aprendida de Xuacu Amieva y Lliberdón, y lletra del poeta Galo Fernández (1884-1939).