Con motivu del vixésimu aniversariu de la creación de la revista Orbayando, na viniente edición de l'Arribada entamaránse delles actividaes col envís de facer recordanza d'aquella iniciativa.

Orbayando foi una revista asturiana d'información que s'editó en Xixón ente los años 1988 y 1990. Nel entamu del númberu cero, que s'asoleyó en setiembre de 1988, xustifícase la ellección del nome de la revista diciendo que vieno de la rempuesta a los requerimientos fechos a D. Patricio Adúriz, cronista oficial de Xixón, n'alcordanza a otra revista, esta de calter lliterariu, qu'asoleyaren el grupu Los Ruxidores, allá pela década de los cincuenta, y que taba formáu, ente otros, por Luciano Castañón, Tomás Montero y Enrique García Rendueles. La revista nació col envís de defender los intereses d'Asturies, los sos valores, les sos señes d'identidá, llingua, vezos, tradiciones y la esistencia de poder políticu p'Asturies, declarándose independiente de cualquier partíu políticu o grupu socioeconómicu de presión. Utilizaba indistintamente la llingua asturiana y castellana nos sos conteníos, que trataben temes d'actualidá, cultura, política, sindicalismu, etc. El conseyu de dirección taba formáu por Humberto Gonzali, Juan Bonifacio Lorenzo Benavente y Xicu Monteserín. El númeru cinco y últimu ta fecháu en mayu de 1990.