La I Xunta d’Escritores en Gallego-asturianu va celebrase los díes 13 a 15 de xunu nel conceyu d’A Veiga, promovida pola Conseyería de Cultura del Principáu y embaxo la dirección de la escritora Aurora García Rivas. La Xunta va suponer el primer alcuentru d’escritores d’esta fastera del occidente asturianu y nella va presentase una nueva revista lliteraria dirixida por Xosé Miguel Suárez.

Aurora García Rivas nació en San Tirso d'Abres. Participó en numberosos recitales y actividaes alrodiu la creación lliteraria n'Asturies y otres comunidaes autónomes. Ye responsable de la estaya de poesía en L'Arribada y foi l'antóloga de la selección de poetes venceyaos al occidente asturianu Na boca de todos. Tien nel so haber importantes premios lliterarios. Ente les sos obres destaquen los llibros O viaxeiro da noite, La Tierra Vertical y Contos, ducia y media d'eles. En 2006 llogró'l prestixosu "Premio Ateneo Jovellanos" de poesía col so poemariu La sombra del Alcaudón.