Yá son más de tres decenios. De trenta años dende l’empiezu d’un procesu de recuperación de la nuestra lliteratura. Trenta años que dieron llogros, estremaos y abundantes, como  pa xustificar un balance optimista. Añu tres añu, la presencia de les nuestres lletres vieno a ser dalgo notorio nel ámbitu de la cultura d’Asturies. Pasu ente pasu un colectivu d’escritores, cada vegada más numberosu, foi a ufiertar al llector obres de gran calidá, guapamente comparables coles meyores de cualesquiera otra llitertura. Poro, cuando emprimó l’Arribada 2006, yera muncho lo que podíemos amuesar a la xente. Y con esi envís, el de facer enforma visible la lliteratura fecha na llingua del país, entamamos un foru abiertu, democráticu, arreyáu a les estayes sociales implicaes na cultura, onde sía posible la participación de lliteratos, investigadores, editores, estudiosos y ciudadanía. Arribamos al puertu de Xixón porque tenemos l’enfotu de convertir a esta villa na capital de la lliteratura n’asturianu. Facer d’ella, y del so conceyu, referentes fundamentales cuando falemos de la más significativa de les nuestres señes d’identidá, la llingua. Y dende Xixón, tendremos d’arribar a otros puertos, siguiendo los nuevos rumbos de la lliteratura asturiana, de la qu’abramos caminos na mar cantábrica que nos empobinen a riberes y cultures hermanes. N’ochobre d’esi añu apenzamos una xera, que fadrá de los llibros y los sos autores la meyor tarxeta de presentación.