La Xunta Direutiva de l’Asociación Cultural l’Arribada celebró'l xueves un conceyu xeneral nel que se nomó a la nueva directiva y se tomaron decisiones sobre les actividaes y  formatu de la edición d’esti añu de la “vagamar lliteraria en Xixón”, que va celebrase del 11 al 21 de setiembre con numberoses novedaes y “col envís d’averar la lliteratura a la sociedá”.

Na nueva directiva continúa de presidente l'escritor y periodista Inaciu Galán, l’escritor y técnicu en desarrollu rural Xosé Nel Riesgo de vicepresidente,  Mayte González como secretaria y el profesor de la Universidá Autónoma de Madrid, David Rivas, como ayalgueru. Nel casu de les vocalíes, súmense  l’escritor y realizador d’audiovisulaes Xosé María Vega, l’etnógrafu y presentador de televisión Alberto Álvarez Peña, l’escritor y xestor cultural Humberto Gonzali y Illán González, realizador, siguiendo na mesma l’abogáu Roberto González.

L’asociación definió parte del programa que se prepara dende va meses y confirmóse la collaboración de delles persones, que como en cada edición trabayen cola organización, na secretaría técnica que se fai a costafecha pal eventu. Ente estes persones tán la poeta Aurora García Rivas, el promotor musical Frichu Yustas, l'escritor Xicu Monteserín o el compositor Juan Carlos Casimiro, ente más otros. Amás, perfilóse’l xuráu del II Premiu Timón, que fuera convocáu esta selmana y va ser entregáu nel trescursu de la celebración de l’Arribada 2008.